అమ్మ… ఈ సెంటిమెంట్ తెలుగు తెరకు ఎప్పుడు కొత్తదే. అమ్మ ప్రేమలో ఎంత నిజాయితీ ఉంటుందో.. అమ్మ సినిమాలు కూడా ప్రేక్షకులకు అంతే సంతృప్తిని కలిగిస్తాయి. ఇప్పటి వరకు అమ్మ సెంటిమెంట్తో వచ్చిన చిత్రాలన్ని సెంటిమెంటల్ హిట్స్గా కొత్త రికార్డ్స్ క్రియేట్ చేశాయి. అమ్మ రాజీనామా, మాతృదేవోభవ, యమలీల, తాజాగా బిచ్చగాడు వంటి చిత్రాలు ఎలాంటి విజయాలు అందుకున్నాయో అందరికీ తెలుసు. ఇప్పుడు అదే సెంటిమెంట్ని కంటిన్యూ చేస్తూ వస్తున్న చిత్రం “అమ్మదీవెన”. ప్రముఖ నటి ఆమని ముఖ్యపాత్రలో, లక్ష్మి సమర్పణలో, శివ ఏటూరి దర్శకత్వంలో.. లక్ష్మమ్మ ప్రొడక్షన్స్ బ్యానర్పై ఎత్తరి మారయ్య, ఎత్తరి చినమారయ్య, ఎత్తరి గురవయ్య సంయుక్తంగా నిర్మిస్తున్నారు. ఈ చిత్రం ఈ నెల 29న విడుదలవుతున్నట్లుగా చిత్రయూనిట్ ప్రకటించింది.
ఈ సందర్భంగా నటి ఆమని మాట్లాడుతూ.. ‘‘దర్శకుడు శివ ఈ కథ చెప్పినప్పుడు చాలా బాగా అనిపించింది. ముఖ్యంగా చాలా సన్నివేశాలు అందరినీ ఆట్టుకునే విధంగా ఉంటాయి. శుభసంకల్పం తర్వాత ఈ సినిమాలో డీ గ్లామర్ పాత్ర చేశాను. యుక్త వయసు నుండి వృద్ధాప్యం వరకు ఓ మహిళా చేసే ప్రయాణమే ఈ సినిమా. ఐదుగురు పిల్లల తల్లి వాళ్ళను ప్రయోజకుల్ని చేసే క్రమంలో ఎలాంటి ఇబ్బందులు ఎదుర్కొంది. సమాజం నుండి ఎదురైన కష్ట నష్టాలను ఎలా అధిగమించింది. తన కుటుంబాన్ని చక్కగా తీర్చిదిద్దడం కోసం ఎలాంటి త్యాగాలు చేసింది అనే ఆసక్తికర అంశాలతో ఈ సినిమా ఉంటుంది. కష్టాలు ఎదురైనప్పుడు ఎదిరించి పోరాడాలి కానీ ఆత్మహత్యతో జీవితాన్ని ముగించకూడదు అని చెప్పే మంచి సందేశం కూడా ఇచ్చారు. ఈ కథ మొత్తం నా పాత్ర చుట్టే తిరుగుతుంది. పోసాని కృష్ణ మురళి ఓ వ్యక్తిగా చక్కగా నటించారు. అలాగే దర్శకుడు శివ కూడా చాలా అనుభవం ఉన్న దర్శకుడిగా తెరకెక్కించాడు. తప్పకుండా ఇది అందరికి నచ్చే సినిమా. ‘అమ్మదీవెన’ ఉంటే చాలనుకునేవారందరి సినిమా. నాకు కూడా కెరీర్ పరంగా చాలా సంతృప్తిని ఇచ్చిన పాత్ర ఇది. ఇంత మంచి చిత్రాన్ని ప్రేక్షకులు తప్పకుండా ఆదరిస్తారని, అప్పుడే మరిన్ని మంచి చిత్రాలు వస్తాయని భావిస్తూ.. చిత్రయూనిట్ అందరికీ శుభాకాంక్షలు తెలుపుతున్నాను..’’ అన్నారు.
ఆమని, పోసాని, నటరాజ్, శ్రీ పల్లవి, శరణ్య, సత్యప్రకాష్, శృతి, డిఎస్ రావు, కావ్య, యశ్వంత్, నాని యాదవ్, అరుణ్ తదితరులు నటించిన ఈ చిత్రానికి ఎడిటర్: జానకిరామ్, డాన్సులు: గణేష్ స్వామి, నాగరాజు, చిరంజీవి, ఫైట్స్: నందు, పి.ఆర్.ఓ.: సాయి సతీష్, పర్వతనేని; మాటలు: శ్రీను. బి, సంగీతం: ఎస్.వి.హెచ్, డిఓపి: సిద్ధం మనోహర్, ఎగ్జిక్యూటివ్ ప్రొడ్యూసర్: పవన్, నిర్మాత: ఎత్తరి గురవయ్య, దర్శకత్వం: శివ ఏటూరి.
