ప్యాన్ ఇండియా స్టార్ ప్రభాస్, సెన్సేషనల్ డైరెక్టర్ ప్రశాంత్ నీల్, అగ్ర నిర్మాణ సంస్థ హోంబలే ఫిలింస్ కాంబినేషన్లో ప్యాన్ ఇండియా మూవీ ‘సలార్’ ఇటీవల ప్రారంభమైన విషయం తెలిసిందే. వరుసగా ప్యాన్ ఇండియా సినిమాలతో టాలీవుడ్ సత్తా ఇదని చాటుతున్న ప్రభాస్.. మరో ప్యాన్ ఇండియా ఫిల్మ్.. అదీ కూడా కెజియఫ్ వంటి సెన్సేషనల్ హిట్ ఇచ్చిన ప్రశాంత్ నీల్తో చేస్తుండటంతో.. ఆయన అభిమానుల ఆనందానికి అవధులు లేవంటే నమ్మాలి. ఇలాంటి ప్యాన్ ఇండియా ఇమేజ్ ఉన్న స్టార్స్ కాంబినేషన్లో సినిమా రూపొందితే చూడాలని ఫ్యాన్సే కాదు.. ప్రేక్షకులు కూడా కోరుకుంటారు. అయితే ఈ కోరికను తీర్చేలా భారీ బడ్జెట్ మూవీని చేయగలిగే నిర్మాత ఎవరా అనే ప్రశ్నకి సమాధానం.. సౌత్ ఇండియా సినిమాను ప్యాన్ ఇండియా రేంజ్లో నిర్మిస్తూ భారీ బడ్జెట్ చిత్రాలకు కేరాఫ్ అడ్రస్గా నిలుస్తున్న హోంబలే ఫిలింస్ అధినేత విజయ్ కిరంగందూర్. ఇలాంటి క్రేజీ కలయికలోనే ‘సలార్’ తెరకెక్కనుండటంతో.. ఈ ప్రాజెక్ట్ పై భారీగా అంచనాలున్నాయి.
ఇక ఈ సినిమాకు సంబంధించి.. నటీనటులను సెర్చ్ చేసే పనిలో దర్శకుడు ప్రశాంత్ నీల్ ఉన్నట్లుగా తెలుస్తోంది. ప్రస్తుతం రాధే శ్యామ్ షూటింగ్ దాదాపు పూర్తి చేసిన ప్రభాస్, నాగ అశ్విన్తో ఓ భారీ ప్రాజెక్ట్, అలాగే ఓం రౌత్తో ‘ఆదిపురుష్’కు కమిటై ఉన్నారు. ఈ రెండు చిత్రాలతో పాటు ‘సలార్’కు కూడా ప్రభాస్ డేట్స్ ఇచ్చేసిన తరుణంలో.. ప్రశాంత్ నీల్ కూడా తన ‘కెజియఫ్ చాప్టర్ 2’ షూటింగ్ని పూర్తి చేసి.. పోస్ట్ ప్రొడక్షన్ పనులు శరవేగంగా జరుపుతున్నాడు. త్వరలోనే ‘సలార్’ సెట్స్పైకి రానుంది. ఈ సినిమాలో ప్రభాస్ సరసన నటించే హీరోయిన్ విషయంలో అనేకానేక పేర్లు వినిపిస్తున్న నేపథ్యంలో.. తాజాగా మరో హీరోయిన్ పేరు సోషల్ మీడియాలో వైరల్ అవుతుంది.
‘సలార్’లో ప్రభాస్ సరసన శృతిహాసన్ హీరోయిన్గా చేయబోతోందంటూ వార్తలు వినిపిస్తున్నాయి. అధికారికంగా చిత్రయూనిట్ అయితే ప్రకటించలేదు కానీ.. ప్రస్తుతం సక్సెస్ మీదున్న శృతిహాసన్.. ఈ ప్రాజెక్ట్లో ఓకే అయినా ఆశ్చర్యపోవాల్సిన అవసరం లేదు. ఎందుకంటే వీరిద్దరి కాంబినేషన్లో ఇంత వరకు ప్రాజెక్ట్ రాలేదు. కాబట్టి.. శృతిహాసన్ ఫైనల్ అయ్యే అవకాశాలు లేకపోలేదు. ఇక ఈ ప్రాజెక్ట్ గురించి దర్శకుడు ప్రశాంత్ నీల్ మాట్లాడుతూ.. హోంబలే ఫిలింస్ అధినేత విజయ్ కిరగందూర్కి, హీరో ప్రభాస్కి ధన్యవాదాలు తెలిపిన విషయం తెలిసిందే. ‘సలార్’ అందర్నీ మెప్పిస్తుందని ఆయన హామీ ఇచ్చేశాడు.
