లంచాలు తీసుకొని కేసులు ఎత్తేసే పోలీసుల కథలు మనకు తెలుసు. అయితే ఇలా చేయడానికి ఎక్కడైనా డబ్బు తీసుకుంటారు. కానీ ఓ పోలీసు మాత్రం ఓ యువతితో నీచంగా ప్రవర్తించాడు. అయితే ఆ ప్రాంతంతలో ఓ సీసీటీవీ ఉందన్న విషయాన్ని అతను గమనించలేదు. అదే అతను చేసిన నీచాన్ని బయట పెట్టింది. పూర్తి వివరాల్లోకి వెళ్తే.. దక్షిణ అమెరికాలోని పెరూలో ఈ ఘటన జరిగింది. ఇక్కడ స్థానికంగా పని చేస్తున్న ఓ పోలీస్ ఆఫీసర్.. ఒక యువతిని పట్టుకున్నాడు. నిబంధనలు అతిక్రమించావంటూ ఆమెపై కేసు పెట్టబోయాడు. ఆమె తనపై కేసు పెట్టొద్దని వేడుకుంది. అదిగో సరిగ్గా అప్పుడే ఆ పోలీసులో దుర్మార్గుడు నిద్ర లేచాడు.
ఆమెపై కేసు పెట్టకుండా ఉండాలంటే తనకు లంచం ఇవ్వాలని డిమాండ్ చేశాడు. అది కూడా అల్లాటప్పా లంచం ఇస్తే సరిపోదని ఆమెను ఓ వింత కోరిక కోరాడు. అదేంటో తెలుసా..? ఓ ముద్దు. అవునండీ.. తనతో ఆ యువతి లిప్‌లాక్ చేస్తే కేసు పెట్టకుండా వదిలేస్తానని హామీ ఇచ్చాడు. ఏమీ చేయలేని పరిస్థితిలో మనసు చంపుకున్న ఆ యువతి అతనికి ముద్దిచ్చింది. అయితే ఈ ముద్దు సీన్ జరిగిన ప్రదేశంలో ఓ సీసీ కెమెరా ఉంది. దీన్ని ఆ పోలీసు చూడలేదు. దీంతో అతని బండారం వెలుగులోకి వచ్చేసింది.
ఈ వీడియో ఎంతగా వైరల్ అయ్యిందంటే.. ఇక్కడి ఓ స్థానిక టీవీ చానల్ కూడా దీన్ని ప్రసారం చేసింది. దీంతో ఈ వీడియో మరింత వైరల్ అయింది. ఈ విషయం అటు తిరిగి ఇటు తిరిగి పోలీసు శాఖ చెవికి చేరింది. అంతే దీన్ని చాలా సీరియస్‌గా తీసుకున్న అధికారులు.. ఈ ముద్దు తీసుకున్న పోలీసు అధికారిని ఉద్యోగం నుంచి సస్పెండ్ చేసినట్లు ఉన్నతాధికారులు వెల్లడించారు. అలాగే ఈ ఘటనపై విచారణ కొనసాగుతుందని వెల్లడించారు.
