Garlic: ఇప్పుడు మనం ఒక కొత్త విషయం గురించి తెలుసుకుందాం. ఇంతకు ముందు మనం వెల్లుల్లి ఉపయోగాల గురించి తెలుసుకున్నాం. కానీ అదే వెల్లుల్లిని వాడే విధానం, ఎలా వాడితే ఎటువంటి ప్రయోజనాలుంటాయో తెలుసుకుందాం. సహజంగా ఏ వస్తువు అయినా సరైన పద్దతిలో వాడినప్పుడే అందులో ఉండే ఔషధ గుణాలు మన శరీరంలో చక్కగా పని చేస్తాయి. తెలిసో, తెలియకో మనం చేసే చిన్న చిన్న తప్పులు మనకి హాని కలిగించేలా ఉంటాయి. అలాగే వెల్లుల్లి గురించి కూడా అటువంటి విషయాలని ఇప్పుడు తెలుసుకుందాం.
వేసవి కాలం పచ్చళ్ళకి చాలా ఫేమస్. చాలా మంది వేసవి వస్తుంది అంటే మామిడి, అల్లం, ఉసిరి, టమోటో లాంటి వాటితో నిల్వ పచ్చళ్ళు తయారు చేస్తూ ఉంటారు. కొంతమంది వెల్లుల్లితో కూడా ఇలా పికిల్ తయారు చేసి నిల్వ చేసుకుంటారు. కానీ అలా చేయడం అనేది ఎంత తప్పో తెలియదు వాళ్ళకి.
వెల్లుల్లిని సహజంగా కూరగా, లేదా మసాలాగా వాడుతుంటాం. అలా వాడడం అనేది సరైన పద్దతే. వెల్లుల్లిలో ఆరోగ్య విలువలు చాలా ఎక్కువగా ఉంటాయి. వెల్లుల్లిలో ఉండే ఎల్లిసిన్ అనే పదార్ధం వలన దానికి అంత మంచి రుచి, వాసన, ఘాటుతనం, ఔషధ గుణాలు వస్తాయి. ఈ వెల్లుల్లితో ఊరగాయ పెట్టడం అస్సలు మంచిది కాదు. ఎందుకంటే దీనిని ఎప్పుడు తాజాగానే తీసుకోవాలి. అప్పుడే అందులో ఉండే ఔషధ గుణాలు మన శరీరంపై చక్కగా ప్రభావం చూపిస్తాయి.
ఇందులో ఉండే ఎల్లిసిన్ వలన ఇమ్యూనిటీ లెవల్స్ పెరిగి, క్యాన్సర్ లాంటి వ్యాధుల్ని నివారించే శక్తి తాజా వెల్లుల్లి ద్వారానే కలుగుతుంది. ఈ ఎల్లిసిన్ వెల్లుల్లిని కోసిన తరువాత నీటిలో ఆరు గంటలు, నూనెలో మూడు గంటలు మాత్రమే ఉంటుంది. కనుక ఈ ఎల్లిసిన్ మీ శరీరానికి పూర్తిగా ఉపయోగపడాలి అంటే మాత్రం దీనిని మీరు తాజాగానే ఉపయోగించాలి తప్ప ఊరగాయగా పెట్టుకోకూడదు.
వెల్లుల్లిని అలాగే రేకలుగా కాకుండా తరిగి కానీ, దంచి కానీ వాడుకోవాలి. తరిగిన వెల్లుల్లి కంటే.. దంచిన వెల్లుల్లిలో ఔషధ గుణాలు పుష్కలంగా లభిస్తాయి. కనుక వెల్లుల్లి దంచి కాసేపు అలానే ఉంచిన తరువాత వాడుకుంటే ఎంతో ఉపయోగం ఉంటుంది.
వెల్లుల్లి రోజు తినడం వలన ఎన్నో ఉపయోగాలు కలుగుతాయని తెలుసు. కానీ చాలా మందికి ఆ వాసన సరిపడదు. దానిని అలాగే రేకలుగా కాకుండా చిన్న చిన్న ముక్కలుగా తరిగి, అందులో కొంచెం ఉప్పు వేసి ఒక చిన్న కవర్లో ఆ ముక్కల్ని ఉంచి, చపాతీ కర్రతో రుద్దినట్లయితే ముద్దగా తయారవుతుంది. ఇప్పుడు దానిని తినవచ్చు. ఆ తరువాత నోటి నుంచి వెల్లుల్లి వాసన పోవాలంటే కొద్దిగా సోంపుని తిన్నట్లైతే ఆ వాసన దూరమవుతుంది.
చూశారు కదా ఎవరైనా ఊరగాయ లాగా వాడుతున్నట్లైతే తక్షణమే మానేసి, కేవలం తాజాగా మాత్రమే వాడి వెల్లుల్లిలో ఉండే ఔషధ గుణాల్ని సంవృద్ధిగా వాడుకోవాలని ఆశిస్తున్నాం. మరో అప్‌డేట్‌లో మరిన్ని ఉపయోగాలు తెలుసుకుందాం.
