యంగ్ టైగర్ ఎన్టీఆర్ కొత్త సినిమా వస్తుంది అంటే చాలు అభిమానుల్లో ఎక్కడా లేని సంతోషం పుట్టుకొచ్చేస్తుంది. అది ఆయనలో ఉన్న గొప్పతనం. ప్రస్తుతం ఆయన నటిస్తున్న ఆర్ ఆర్ ఆర్ చిత్ర షూటింగ్ చివరి దశకు చేరుకుంటుంది. ఈ చిత్రం తరువాత ఎన్టీఆర్ అరవింద సమేత సినిమాతో సూపర్ హిట్ని అందించిన దర్శకుడు, మాటల మాంత్రికుడు అయిన త్రివిక్రమ్ శ్రీనివాస్తో ఓ సినిమా ప్రకటించిన విషయం తెలిసిందే. తాజాగా అందుతున్న సమాచారం ప్రకారం ఈ చిత్రం తెలుగు వారి మొదటి పండగ అయిన ఉగాది రోజున ప్రారంభించాలని నిర్ణయించినట్లుగా తెలుస్తోంది. ఇది ఎన్టీఆర్ కి 30 వ సినిమా.
అరవింద సమేత తరువాత వీరిద్దరి కాంబినేషన్ లో వస్తున్న చిత్రం కావడంతో ఈ చిత్రంపై భారీగా అంచనాలు నెలకొన్నాయి. కాగా ఈ చిత్రం షూటింగ్ ఏప్రిల్ లో మొదలు పెట్టి, మే, జూన్ నెలల్లో సినిమా షూటింగ్ మొత్తాన్ని కంప్లీట్ చేయాలనే ప్లాన్ లో ఉన్నట్లు తెలుస్తోంది. ఈ ఏడాది చివరి లోపే ఈ చిత్రాన్ని కంప్లీట్ చేసేసి, వెంటనే మరో చిత్రం షూటింగ్ కి వెళ్లాలనే ఆలోచనలో ఎన్టీఆర్ ఉన్నట్లు తెలుస్తోంది. కాగా ఈ చిత్రాన్ని ఎన్టీఆర్ ఆర్ట్స్, హారిక అండ్ హాసిని క్రియేషన్స్ బ్యానర్ పై రూపొందిస్తున్నట్లు తెలుస్తోంది.
మరోవైపు ఎన్టీఆర్ నటిస్తున్న ఆర్ ఆర్ ఆర్ చిత్రాన్ని అక్టోబర్ 13 న దసరా కానుకగా విడుదల చేయడానికి సన్నాహాలు జరుగుతున్నాయి. ఈ చిత్రంలో ఎన్టీఆర్ కొమురం భీమ్ పాత్రలో నటిస్తున్న విషయం తెలిసిందే. ఈ చిత్రంలో ఎన్టీఆర్తో పాటు మెగా పవర్ స్టార్ రామ్ చరణ్ కూడా నటిస్తున్నాడు. సంచలన దర్శకుడు ఎస్. ఎస్. రాజమౌళి తెరకెక్కిస్తున్న ఈ చిత్రం భారీ తారాగణంతో తెరకెక్కుతోంది.