ఆడవాళ్లపై తరచూ లైంగిక వేధింపులు జరుగుతూనే ఉన్నాయి. సాధారణ మహిళలే కాదు… సెలబ్రిటీల పై కూడా ఈ లైంగిక వేధింపులు జరుగుతున్నట్లుగా ఈ మధ్య కొన్ని సంఘటనలు వెలుగులోకి వస్తున్నాయి. దీనిపై సినిమా ఇండస్ట్రీలో మీటూ అంటూ ఓ ఉద్యమం కూడా నడిచింది. లైంగిక వేధింపులకు గురైన వారు ధైర్యంగా ముందుకు వచ్చి మీటూ అంటూ చెబుతున్నారు. కానీ ఈ ఉద్యమాన్ని కూడా కొందరు నీరుకార్చారు. కానీ కొంతమంది ఈ వేధింపుల్ని మర్చిపోవడం అనేది సాధ్యం కానీ పని. అది కూడా ఏమి తెలియని చిన్న తనంలో జరిగినవి ఎప్పుడు వెంటాడుతూ ఉంటాయి. అటువంటి ఒక సంఘటన ఓ నటి జీవితంలో కూడా ఎదురైందని ఆ నటి చెప్పుకొచ్చింది.
సల్మాన్ ఖాన్ మాజీ ప్రియురాలు, ఒకప్పటి బాలీవుడ్ నటి సోమి అలీ తన 5 సంవత్సరాల వయస్సులో జరిగిన సంఘటనను గుర్తు చేసుకుంటూ ఇలా చెప్పింది. పాకిస్థాన్ లో మొదటిసారిగా తనపై లైంగిక వేధింపులు జరిగాయని, వాళ్ళు ఉంటున్న క్వార్టర్స్ లో తనపై ఒక సేవకుడు మిస్ బీహేవ్ చేశాడని, ఆ విషయం గురించి తన తల్లిదండ్రులతో చెప్పిన అతనిపై చర్యలు తీసుకున్నారు కానీ.. బయటికి విషయం రాకుండా జాగ్రత్తగా పడ్డారని, ఈ విషయం ఎవరికీ చెప్పొద్దని తనకు అప్పట్లో చెప్పారని.. సోమీ అలీ ఆవేదన వ్యక్తం చేసింది. అంతేకాక 14 సంవత్సరాల వయసులో కూడా తనపై అత్యాచారం జరిగిందని సోమి వాపోయింది.
ప్రస్తుతం ఈమె ‘నో మోర్ టియర్స్’ అనే స్వచ్చంధ సంస్థను స్థాపించి, అత్యాచారానికి గురైన వారిని, తనలా లైంగిక వేధింపులను అనుభవించిన వారికీ అండగా ఉంటుంది. ఈ మధ్య జరిగిన ఓ ఇంటర్వ్యూలో ఆమె తనపై జరిగిన వేధింపుల గురించి మాట్లాడుతూ.. గత మూడు సంవత్సరాలుగా వీటి గురించి మాట్లాడుతున్నానని, ఇప్పటికి మాట్లాడకపోతే నేను తప్పు చేస్తున్నట్లే అవుతుందనే.. ఇప్పుడు నోరు విప్పుతున్నానని తెలిపింది.
