చెన్నై: టీమిండియా సీనియర్ స్పిన్నర్ రవిచంద్రన్ అశ్విన్ అత్యంత అరుదైన మరో ఘనత సాధించాడు. చెన్నై వేదికగా ఇంగ్లండ్‌తో జరుగుతున్న తొలి టెస్టు రెండో ఇన్నింగ్స్‌లో అశ్విన్ ఆరు వికెట్లు పడగొట్టిన విషయం తెలిసిందే. ఇలా ఒక ఇన్నింగ్స్‌లో ఐదు, అంతకంటే ఎక్కువ వికెట్లు తీయడం అశ్విన్ కెరీర్‌లో ఇది 28వ సారి. చెన్నై టెస్టు ప్రదర్శనతో ఇన్నిసార్లు ఐదు, అంతకంటే ఎక్కువ వికెట్లు తీసిన స్పిన్నర్ల జాబితాలో అశ్విన్ చేరిపోయాడు.
ఈ జాబితాలో ఇంగ్లండ్ గ్రేట్ ఇయాన్ బోథమ్‌ను సైతం అశ్విన్ వెనక్కి నెట్టేశాడు. ఈ ఘనత సాధించిన క్రికెటర్ల ఆల్‌టైం జాబితాలో 8వ స్థానాన్ని ఆక్రమించాడు. అలాగే ఈ రికార్డు సృష్టించిన స్పిన్నర్లలో ఐదో వాడిగా, ఇండియా నుంచి ఈ ఘనత సాధించిన రెండో బౌలర్‌గా అశ్విన్ రికార్డు నెలకొల్పాడు. అశ్విన్ కంటే ముందు టీమిండియా దిగ్గజ స్పిన్నర్ అనిల్ కుంబ్లే ఈ రికార్డు సాధించిన వారి జాబితాలో ఉన్నాడు. కుంబ్లే తన కెరీర్‌లో 35సార్లు ఈ ఘనత సాధించాడు.
రెండో ఇన్నింగ్స్‌లో తొలి ఓవర్ తొలి బంతికే ఇంగ్లండ్ ఓపెనర్ రోరీ బర్న్స్ వికెట్‌ను అశ్విన్ పడగొట్టాడు. దీంతో అశ్విన్ పేరిట మరో రికార్డు కూడా చేరింది. 1907వ సంవత్సరం తర్వాత క్రికెట్ చరిత్రలో ఇలా ఓ ఇన్నింగ్స్ తొలి బంతికే వికెట్ తీయడం ఇదే తొలిసారి. 114 ఏళ్ల తర్వాత ఈ ఫీట్ సాధించిన తొలి స్పిన్నర్‌గా అశ్విన్.. తన పేరును రికార్డు పుస్తకాల్లో రాసుకున్నాడు. అంతేకాదు, చెన్నై టెస్టులో బంతితో మాయ చేసిన అశ్విన్.. 15 సార్లు ఆరు వికెట్లు పడగొట్టిన బౌలర్‌గా మరో రికార్డు కూడా తన ఖాతాలో వేసుకున్నాడు. ఈ ఘనత సాధించిన క్రికెటర్ల జాబితాలో అశ్విన్ ఆరో స్థానంలో ఉన్నాడు. అయితే ఈ జాబితాలో కూడా భారత దిగ్గజ స్పిన్నర్ అనిల్ కుంబ్లే తొలి స్థానాన్ని ఆక్రమించాడు. దీంతో అశ్విన్ రెండో స్థానానికే పరిమితం అయ్యాడు. కుంబ్లే తన కెరీర్‌లో 19 సార్లు ఆరు వికెట్లు సాధించాడు.
చెన్నైలో పడగొట్టిన వికెట్లతో కలుపుకుని అశ్విన్ ఇప్పటి వరకూ టెస్టుల్లో 386 వికెట్లు కూల్చాడు. 75 టెస్టుల తర్వాత ఓ బౌలర్ సాధించిన రెండో అత్యధిక వికెట్లు ఇవే. ఈ జాబితాలో శ్రీలంక స్పిన్ మాంత్రికుడు ముత్తయ్య మురళీధరన్ 420 వికెట్లతో అశ్విన్ కంటే ముందు వరుసలో ఉన్నాడు.
